Sapy'ante ningo ñaimo'â jaikuaapámaha ko yvy ape ári, ha upéi ñaha'arô'yrê jahechakuaa ndajaikuaaiha mba'eve ra'e añetehame.




Kuehe aha ahecha tan'angamyi Interstellar ha'eva tembiapo ipyahuve ojapóva Christopher Nolan, ha añetehame apyta ñe'êngu opa rire. Kóvape ojehe'a heta ñeñandu, vy'a, ñembyasy, py'apy ha pochy.

Ko ta'angamyi ohechauka mba'éichapa peteî tuva oheja ohayhuvéva oho haguâ mombyry oipytyvô ñande yvyapu'a ani haguâ opa, ha kóva ojapo haguâ ombohovake va'erâ itajyrape.

Añetehame Nolan ñandegueraha ko túva ha ambue avándi mombyry umi tenda araka'eve ndajahechái va'ekue ha ha'etevaicha ja'ytáva hendivekuéra umi kuarahy ha mbyja apytépe. Ñañembyasy ha jajepy'apy hendivekuéra, ha'etévaicha pe iñembyasy ha'éva ñanemba'e avei ha upéva ha'e iporâve oguerekóva cine.

Matthew Mcconaughey ohechauka opytamaha tapykue umi ta'angamyi nandi ojapóva'ekue yma. Peteî arype henonde'a ha ohechauka ikatuha ohecha pypuku umi poguasu omoingovétavape. Katuete ñahendutaiti hina héra heta. Upe aja katu Anne Hataway ojapo porâ avei hembiapo, imarangatu ohejavo iñangirû henonde'a, ha omomichîve ipoguasu ikatu haguâ pe oñemombe'úva ojehecha porâve.

Purahéi, upévare heta añe'êse. Che ningo aguerohoryeterei Hans Zimmer rembiapo, ha kóva ko ta'angamyime katu ko'ytevéntema, opa mba'e ñahendúva ipukukue jave omohe'ê ñande apysa, pe purahéikuera ome'ê opa mba'e oikóvape tuichave ñeñandu. Vy'apave Hans, rejapo jeyma rejaposéva (:

Ha mba'ére añe'ê mborayhúre?
Ko ta'angamyi ohechauka haguére umi ohova ojeheka yvaga paháre ha'eha avei tapicha ñandéicha oñandúva, ha ñanembo'e mborayhu ha'eha opytáva ñandéve opa ára ha tenda jahahápe mombyryve ramo jepe.

Ikaturô peho, ani pembojereterei pene akâme, napembyasy mo'âi.